Styrkir til fyrirtækja

Öll fyrirtæki á almenna markaðnum með starfsfólk í Eflingu, VSFK og Verkalýðsfélaginu Hlíf í Hafnarfirði eiga rétt á og geta sótt um styrk til sjóðsins. Ekki þarf að sækja sérstaklega um aðild heldur myndast réttur við greiðslu launatengdra gjalda sem innheimt eru af hlutaðeigandi stéttafélagi fyrir hönd sjóðsins.

Í því felst að fullur réttur vegna starfsmanns myndast um leið og fyrstu laun auk launatengdra gjalda hafa verið greidd, að því gefnu að fyrirtækið hafi greitt iðgjöld í sjóðinn samfellt í 12 mánuði og sé í skilum.

Sótt er um á sameiginlegri vefgátt sjóða, www.attin.is, sjá flipa merktur umsóknargátt hér fyrir ofan. Í hverri umsókn er gert ráð fyrir einum reikningi vegna eins námskeiðs ásamt viðeigandi fylgigögnum. Hægt er að sækja um til margra sjóða í einni umsókn, ef þátttakendur eru í mörgum stéttafélögum og þar af leiðandi snerting við marga sjóði, svo lengi sem það er aðeins einn reikningur. Hér má sjá tengsl stéttafélaga og sjóða

Athugið að styrkur til fyrirtækis skerðir ekki rétt starfsmanns til einstaklingsstyrks en gerð er sú krafa að starfsmaður sé upplýstur þegar sótt er um styrk til Starfsafls vegna viðkomandi.

Það er mikilvægt að kynna sér reglurnar hér fyrir neðan og neðarlega á síðunni má lesa hvaða gögn þarf með umsókn.

Reglur Starfsafls varðandi styrki til fyrirtækja eru eftirfarandi

1. Úthlutunarreglur

a. Fyrirtæki sem greitt hafa iðgjöld í sjóðinn* í samfellt 12 mánuði við dagsetningu umsóknar og eru í skilum, geta sótt um styrk.

b. Starfsafl styrkir að öllu jöfnu fyrirtæki um 90% af kostnaði fyrir sína félagsmenn* vegna starfstengdrar fræðslu og náms .

c. Ef fyrirtæki er ekki í aðild að Samtökum atvinnulífsins þá er styrkhlutfall 90% af 90% eða 90% af 50% þar sem það á við.

d. Fyrirtæki geta fengið allt að 4 mkr. á ári í styrk.

e. Salarleiga í tengslum við námskeiðahald er styrkt um 90% þar sem það á við. Á einungis við um lítil fyrirtæki sem ekki hafa aðgang að sal og leggja verður fram rök fyrir því og reikning fyrir kostnaði.

f. Túlkaþjónusta sem fer fram á starfstengdum námskeiðum er styrkt um 90% af kostnaði, sjá nánar hér

2. Upphæð styrkja vegna náms einstaklinga sem greitt er af fyrirtæki

Greitt er að hámarki kr. 300.000 til fyrirtækja vegna einstaklingsnáms starfsmanna þó aldrei meir en 90% af reikningi. Hámarksstyrk er ekki hægt að sækja um oftar en einu sinni vegna sama félagsmanns nema fram sé lagður gildur rökstuðningur. Hér undir fellur m.a. rútu- og meirapróf.

3. Sameiginlegur styrkur félagsmanns og fyrirtækis

Félagsmaður og fyrirtæki geta sótt sameiginlega um styrk vegna starfstengdrar fræðslu, sjá nánar hér

4. Stafræn fræðsla

a. Styrkt er áskrift að stafrænu námsumhverfi um 90% af reikningi en þó aldrei meira en kr. 6000,- fyrir hvern félagsmann á ári. Með umsókn þarf að fylgja greinagerð, sjá hér

b. Upptekin fræðsla (myndbönd og annað stafrænt margmiðlunarefni), fræðslusöfn og fræðsluöpp eru styrkt 50% af reikningi fyrir hóp starfsfólks og 90% af reikningi fyrir einstaklingsáskrift. Einstaklingsáskrift telst áskrift fyrir einn notanda á sama reikningi, en nái áskrift til fleiri notenda, telst hún hópáskrift.

c. Þau fyrirtæki sem útbúa eigið stafrænt námsefni fyrir stafrænt námsumhverfi geta sótt sérstaklega um styrk til sjóðsins en veittur er allt að 400.000 króna styrkur vegna eigin námsefnisgerðar. Hámarksfjöldi styrkja eru fjórir á almannaksári, sjá hér

5. Námsefnisgerð, nýsköpunar-og þróunarstyrkir

Þau verkefni sem stuðla að nýsköpun í menntun félagsmanna Starfsafls ásamt þróunarverkefnum munu njóta forgangs við styrkveitingu sjá umsóknareyðublað hér.

Þau fylgiskjöl sem þarf með umsókn eru án undantekninga samanber eftirfarandi:

1. Upplýsingar um fræðsluna (stutta samantekt á efnisþáttum eða lýsingu á nám, slóð á vefsíðu).

2. Reikningur á kennitölu fyrirtækis, þar sem sundurliðun kostnaðarþátta er skýr. Reikningur má ekki vera eldri en 12 mánaða.

3. Staðfesting á greiðslu, þ.e. bankakvittun úr íslenskum banka sem staðfestir greiðslu í íslenskum krónum.

4. Listi yfir alla þátttakendur, nöfn, kennitölur og stéttarfélagsaðild (í excel skjali) + yfirlit yfir skil á iðgjöldum vegna þess starfsfólks sem telst til félagsfólks Eflingar, sjá nánar hér.

+ Önnur möguleg gögn, sjá t.d. nánar reglur um stafræna fræðslu og sameiginlegan styrk félagsmanns og fyrirtækis.

Vinsamlegast athugið að umsókn er hafnað ef eitthvað af tilgreindum gögnum vantar.

Skilyrði og fyrirvarar

Starfsafl áskilur sér rétt til að taka til skoðunar og kalla eftir nánari upplýsingum um:

efnisinnihald námskeiða
kostnaðaráætlanir
hæfi leiðbeinenda

Starfsafl áskilur sér jafnframt rétt til að gera athugasemdir við eða takmarka styrkveitingu ef verðlagning náms telst ekki í samræmi við viðmið á markaði

Að gefnu tilefni áskilur Starfsafl sér rétt til að hafna umsóknum.

Misnotkun á fræðslusjóði og viðurlög

Umsækjandi sem reynist hafa gefið rangar eða villandi upplýsingar og eða notar fölsuð gögn við styrkumsókn, missir rétt sinn til styrks í 36 mánuði. Hafi umsækjandi fengið greidda styrkupphæð á grundvelli falsaðra og eða rangra gagna, er heimilt að krefja viðkomandi um endurgreiðslu á heildarupphæð styrks auk dráttarvaxta. Stjórn sjóðsins áskilur sér rétt til að kæra til lögreglu brot af þessu tagi.

* Fyrirtæki sem greiða af starfsmönnum til Eflingar, VSFK og Verkalýðsfélagsins Hlífar, geta sótt um styrki tíl námskeiðahalds. Á það er bent að sjálfstætt starfandi einstaklingar (eigendur fyrirtækja) geta ekki átt aðild að þessum stéttafélögum (sjá reglur félaga) og eru þar með ekki gildir umsækjendur í sjóðinn.