Vika íslenskrar tungu er haldin árlega í byrjun nóvembermánaðar og  er þá  kastljósinu beint að mikilvægi íslenskunnar í íslensku samfélagi, samfélagi sem verður fjölbreyttara með hverju árinu.  Í dag er  fjórði hver á íslenskum vinnumarkaði  innflytjandi og ef litið er til félagsfólks Eflingar þá er þar að finna fjölbreyttan hóp einstaklinga frá hátt í 90 þjóðlöndum. 

Að skilja og geta talað íslensku er mikilvægur þáttur þess að aðlagst samfélaginu, vinnumarkaði og þá vinnustað. Að þekkja og skilja menningarleg blæbrigði, félagsleg viðmið, siði og venjur og þannig geta verið virkur þátttakandi. er fyrir alla ómetanlegt.  Aldrei fyrr hefur vika íslenskrar tungu verið miklvægari. 

Í aðdraganda vikunnar í ár og í vikunni sjálfri birtust greinar um hlutverk og mikilvægi tungumálsins í daglegu lífi, menntun og atvinnu. Einnig voru haldnir fjölbreyttir viðburðir þar sem íslenskan var í brennidepli og fjallað um áskoranir og tækifæri í tungumálanámi fullorðinna.  

Tungumálafulltrúi á vinnustað – ný nálgun í tungumálastuðningi

Fyrst ber að nefna grein í Gátt, veftímariti um fullorðinsfræðslu, þar sem fjallað um Norskt verðlaunaverkefni sem kallast tungumálafulltrúi á vinnustað. Tungumálafulltrúinn er starfsmaður sem hlýtur þjálfun í að veita tungumálastuðning á vinnustað til nýliða sem hafa ekki góða þekkingu í tungumálinu. Þessu má líkja við öryggisfulltrúa í fyrirtækjum sem vinna að góðum venjum svo að heilsa, umhverfi og öryggi séu tryggð. Á sama hátt tekur tungumálafulltrúinn þátt í að tryggja að góður skilningur á tungumálinu sé til staðar og er markmiðið að vinnuumhverfið virki hvetjandi fyrir tungumálanám, þannig að allir leggi sitt af mörkum til að skilja hver annan, sjá nánar hér

ASÍ-málþing um stöðu kvenna af erlendum uppruna

Á málþingi ASÍ um stöðu kvenna af erlendum uppruna á vinnumarkaði var áhugaverð málstofa sem bar yfirkriftina „Viðurkenning á hæfni og menntun, aðgengi að íslenskukennslu“ en þar var mikilvægi íslenskrar tungu gerð góð skil í fjórum áhugaverðum erindum og pallborðsumræðum, sjá nánar hér

Ársfundur Fræðslumiðstöðvar atvinnulífsins – tenging fjölbreytileika og tungumálalærdóms

Ársfundur Fræðslumiðstöðvar atvinnulífsins, sem bar yfirskriftina „Tengjum saman: fjölbreytileiki, lærdómur, vöxtur“, var einnig vettvangur umræðna um íslenskuna og hlutverk hennar á síbreytilegum vinnumarkaði. Þar voru kynntar tölur um fjármuni sem runnið hafa til íslenskunáms á undanförnum árum, meðal annars frá ríkinu, Fræðslusjóði, Rannís og starfsmenntasjóðum atvinnulífsins. Niðurstöðurnar varpa ljósi á mikla eftirspurn og vaxandi þörf fyrir markvissa íslenskukennslu fyrir fólk af erlendum uppruna, sjá nánar hér

Framlag starfsmenntasjóða – íslenskunám sem grunnur að virkri þátttöku

Starfsmenntasjóðir atvinnulífsins hafa lagt áherslu á að styðja við íslenskunám, bæði innan og utan vinnustaða. 

Hjá Starfsafli eru reglur vegna íslenskunám samanber eftirfarandi:

• Einstaklingar sem hefja störf á Íslandi geta fengið fullan styrk til íslenskunáms eftir einn mánuð í félagsaðild að stéttarfélagi.

• Fyrirtæki geta fengið allt að 90% endurgreiðslu á kostnaði vegna íslenskunáms starfsfólks, strax á fyrsta mánuði í starfi. 

Gera má ráð fyrir að á árinu 2025 verði um 25% af öllum styrkjum Starfsafls, bæði til fyrirtækja og einstaklinga, nýtt í íslenskunám. Þetta undirstrikar skýrt vilja atvinnulífsins til að efla færni á íslensku og styðja við fjölbreyttan og öflugan vinnumarkað.

Fyrirtæki sem hafa áhuga á að kynna sér sjóðinn og kanna hvaða leiðir eru færar, er velkomið að hafa samband í síma 6930097 eða með tölvupósti á [email protected]. Einstaklingum er bent á hlutaðeigandi stéttafélag, eins og áður segir, en þar fer fram afgreiðsla styrkja til einstaklinga.

Myndin með fréttinni er fengin hér