Fosshótel Reykjavík fær fræðslustjóra

Starfsafl og IÐAN fræðslusetur skrifuðu undir samning í morgun við Fosshótel Reykjavík um að lána fyrirtækinu fræðslustjóra. Attentus – mannauður og ráðgjöf ehf er fræðslustjóri að láni. Fræðslustjóranum er ætlað að aðstoða fyrirtækið við að kortleggja hæfni og þjálfunarþörf starfsmanna fyrirtæksins.

Fosshótel Reykjavík er eitt nýjasta hótelið í Reykjavík og jafnframt það stærsta, glæsilegt fjögurra stjörnu hótel með ráðstefnuaðstöðu, veitingasölum, veitingastöðum og öllum þægindum.  Það er staðsett við Þórunnartún í göngufæri við miðborgina. Fyrirtækið vill nú færa fræðslu starfsmanna í markvissan búning og gera fræðsluáætlun sem hentar þörfum fyrirtækisins. Starfsmenn eru rúmlega 170, þar af eru félagsmenn með aðild að Starfsafli um 120 talsins.