Capital Hotels fær Fræðslustjóra að láni

Undirritaður hefur verið samningur um verkefnið Fræðslustjóra að láni við Capital Hotels. Um klasaverkefni er að ræða sem nær til fjögurra hótela alls undir merkjum Capital Hotels; B59 Hótel ehf, City Park hótel ehf, Hótelkeðjan ehf og Capital inn ehf.

Eins og nafnið gefur til kynna er um hótel að ræða, þrú í Reykjvík og eitt í Borgarnesi. Samanlagður fjöldi starfsfólks er um 100.

Í rökstuðningi fyrirtækisins með umsókn segir eftirfarandi:

Fyrirtækið er í miklum vexti og hefur vaxið hratt síðustu árin. Því fylgir aukin starfsmannavelta og köllun á bættari verkferla þegar kemur að starfsháttum og þjálfun starfsmanna. 

Við höfum mikinn áhuga á að fá fræðslustjóra að láni til að efla starfsfólkið okkar. Við viljum með þessu verkefni setja niður áætlun svo fræðsla starfsfólksins verði sett niður á markvissari máta en hefur verið. Við teljum að með því að leggja rækt við fólkið okkar, efla það og styrkja mun fyrirtækið ná betur markmiðum sínum. Við viljum samstilla verkferla á hótelunum, auka þjónustuna og skapa sterka fyrirtækjamenningu þar sem starfsfólkinu líður vel og vill vinna í til lengri tíma.

Tveir sjóðir koma að verkefninu, Starfsafl og Landsmennt. Ráðgjafi verkefnisins er Eva Karen Þórðardóttir  hjá Effect ehf, en hún hefur stýrt fjölda verkefna á þessu sviði fyrir sjóðina.

Verkefnið felur í sér að sjóðirnir leggja til “Fræðslustjóra að láni”, fræðslu- og mannauðsráðgjafa, sem greinir fræðsluþarfir fyrirtækisins og semur fræðsluáætlun byggða á greiningunni.

Fræðsluáætlunin skal vera með útfærslu að leiðum, tímasetningu námskeiða og tillögum að fræðsluaðilum ásamt aðgerðum um þjálfun og menntun til styttri og lengri tíma. Greiningin og fræðsluáætlunin er ávallt unnin í nánu samstarfi með starfsmönnum og stjórnendum fyrirtækisins. Allur kostnaður vegna ráðgjafans er greiddur af þeim sjóðum sem að verkefninu koma en framlag fyrirtækisins felst í framlögðum tíma starfsfólks.